台灣節目《我愛黑澀會》熱潮冷卻，但黑人老大最鍾意講嘅「態度」依然令我印象難忘，證明態度幾緊要！杜利馬聽朝喺自由盃G組主場對學生隊（左圖左），開W搶3分唔奇，呢場波杜利馬唔贏就出局，高原主場出擊必搏甩髀，相反學生隊和波都出線隨時Hea踢，受讓平半咪掂！（開賽時間：周四早上6:30）
態度決定一切，目前杜利馬喺分組賽得1勝1和2負，落後第2位嘅學生隊5分，假如呢場W唔出就提早講再見，試問點會唔搏？雖然杜利馬上場分組賽作客1:6慘負高士路，但佢哋勝在有高原主場，計埋外圍賽今屆自由盃主場3戰有2勝1和，當中包括以2:0打沉哥連泰斯，證明有料到。
另一方面，學生隊近7場自由盃作客得3勝1和3負，上場分組賽佢哋主場5:1大勝瓜蘭尼，更有後衞朗卡尼亞領紅今場停賽，至於中場巴拉拿同後衞費達歷高費南迪斯亦因傷缺陣，要知道學生隊打沉瓜蘭尼嗰場波，佢哋3個全部踢正選，家陣殘陣作客靠唔住，特別係學生隊形勢上和都出線，踢落自然冇咁肉緊，輸波真係唔出奇o架。
