3支葡超隊伍齊齊入歐霸盃4強？世事邊會咁完美吖！揸住1個作客入球喺手嘅布拉加，今晚回師主場恭候基輔戴拿模進行8強次回合賽事，形勢上係布拉加佔優，但基輔教頭施奧明為保飯碗肯定唔會就範，更何況布拉加防線穿晒大窿，基輔即使有「軍刀」舒夫真高停賽，受讓平半下盤都捧得過。（有線61及201周五凌晨3:05直播）
「軍刀」停賽鋒力一樣勁
首回合雙方打成1:1，意味着基輔即使去到葡萄牙都要焗攻。雖然話全隊個朵最響嗰件舒夫真高要坐波監，但查實基輔家陣嘅入球重任主要落喺耶莫倫高同米列夫斯基身上，呢對鋒將今季喺烏超已合力轟入17球，照計缺少一把年紀嘅「軍刀」唔會對鋒力有太大影響。
布拉加葡超搏到殘
基輔剛啱喺聯賽只能夠逼和米達雷治，目前足足落後榜首嘅薩克達11分，聯賽錦標凍過水，歐霸盃自然係唯一目標。況且會方最近放風，想搵前米杜士堡領隊史特根來季掌舵，教練施奧明為保住份工，當然要做番齣好戲，今鋪佢老人家實使盡渾身解數領軍抗敵。
波圖同賓菲加喺另邊廂都係大比數領先對手，晉級機會可謂高唱入雲，同屬葡超勁旅嘅布拉加當然想齊齊出線。布拉加剛啱喺葡超以3:1砌低甘馬雷斯，教練柏斯安西亞勁重視呢場地區打吡，所以施維奧文奴、保拿奧、維亞拿同洛迪高利馬幾位主將都搏足全場，體力上或多或少受影響，加上一對守將米基爾加西亞同哥迪安奴卡卡今晚要停賽，仲要讓波當然信唔過。
