薑始終係老嘅辣!上年10月曼聯主場慘敗畀曼城後,領隊費格遜話下半季先係紅魔發力嘅時候,估唔到真係應驗晒,傷兵滿營依然可以追到同曼城同分,依家紅魔氣勢如虹,今晚即使要作客史丹福橋球場大戰車路士,喺朗尼等主力復出下隨時再下一城,紅魔平手盤係阿占心水之選。(有線200、204(3D版本)及300、廣東體育周一凌晨0:00直播)
呢幾日天氣凍凍哋,真係唔多想落床睇波,好彩「cable即時睇」已經上架,有 iPhone或iPad嘅你就可以舒舒服服留喺床度睇波,只要係有線用戶就可以下載!但今晚如果想睇3D直播,當然都要扭返開hd204台啦!
朗尼 拿尼傷愈復出
講番今晚場英超大戰,曼聯今季一直有唔少問題,不過佢哋嘅「冠軍DNA」真係唔講得笑,無論喺乜劣勢之下都有辦法殺出血路,依家有半隊十字軍又點?唔覺唔覺聯賽又連贏3場,連賣走嘅吉遜都幫到手喺愛華頓搞掂曼城,家陣好似成個英超都係紅魔嘅人咁。就算老將史高斯冇打咁耐,復出後擔正亦完全冇唔夾,呢啲咪就係費Sir多年培育出嚟嘅「冠軍DNA」囉!
車仔近8戰得2勝
賽前消息話朗尼今場可以復出,拿尼亦都有機會趕及傷愈,加埋近況大勇嘅路爾斯華倫西亞、韋碧克等,就算仲有成堆傷兵都冇有怕啦!其實費格遜喺1月死都唔買人,擺明就對隊波信心十足,費Sir話過曼聯例牌下半季發威,絕對唔係亂講架!
主隊車路士依家要以保住前四為目標,不過佢哋踢得真係幾差,近8場聯賽只係贏過2場,除咗杜奧巴、沙洛文卡勞踢緊非國盃未歸隊,拉美利斯受傷唔出得,艾殊利高爾又因為上場食紅牌要停賽,靠深陷入球荒嘅費托孭飛?曼聯想唔贏都幾難啦!
橫數千軍
車仔主場鬥紅魔唔失禮
‧費托近7次英超對曼聯入4球。
‧近9次英超主場對曼聯不敗。
曼聯近6次交手5勝
‧近6次交手得5勝。
‧朗尼近7次英超對車仔入4球。