英超爭霸戰進入大直路,阿仙奴要繼續搶分保住爭標希望,今晚造訪熱刺合演北倫敦打吡,賽前例牌又要話不容再失,之不過剛啱喺歐聯出局嘅熱刺,又何嘗唔係要爭入前4呢?熱刺今季主場表現穩定,加上傷兵問題亦得到紓緩,點計都唔比兵工廠輸蝕,受讓平半寧撐下盤。(有線201及301 周四凌晨2:45直播)
兵工廠嘅噩夢早喺2月底開始,本來仲話爭做4冠王,點知聯賽盃、歐聯同足總盃輪住Game Over,唔少「廠迷」都戥佢哋唔抵,不過亨格比利就認為佢哋係咎由自取,一啲都唔值得同情。就以佢哋近4場聯賽為例,除咗贏過黑池之外,對住西布朗、布力般都係失分收場,上場對出咗一大堆新仔嘅利物浦諗住補時入12碼有運行,點知最尾都係要失分收場,連運都冇埋。想後來居上?慳啲啦!
派拿高治傷愈
熱刺嘅近況唔好得阿仙奴幾多,對上5場聯賽只係贏過1場,不過佢哋已經喺歐聯出局,嚟緊可以專心應付聯賽爭入前4,鬥心唔使懷疑。人氣左翼加里夫巴利攞完英格蘭球員先生獎沖喜,中場派拿同前鋒高治又告傷愈可候命,加上迪科爾仲差1球就可以加入熱刺「百球俱樂部」,對住同市死敵阿仙奴肯定戰意旺盛。
雙方對上兩次喺英超交鋒都係熱刺贏,佢哋今季喺主場15戰亦只係輸過1場咁大把,對住咁唔爭氣嘅阿仙奴至少可以立於不敗之地,受讓平半梗係抵捧啦!考慮到兵工廠上仗對住防線甩皮甩骨嘅紅軍都咬唔入,熱刺近6場又有4次開細,補埋入球細仲好路。