歐聯8強首回合殺到埋身!皇家馬德里今晚主場迎戰熱刺話題多多,倒戈嘅雲達華治對住踢走佢嘅皇馬,誓言要做齣好戲!兩隊主將C朗拿度同加里夫巴利亦加緊療傷,準備喺今場大戰搏殺!皇馬同熱刺均有猛虎出柙,預計會有好多入波,捧1.72倍入球大!(有線61、64、201及203、中央5台周三凌晨2:45直播)
雖然皇馬喺西甲仲未放棄追趕巴塞隆拿,但剛剛喺主埸輸畀希杭,連莫連奴9年來150場主埸不敗紀錄都終止埋,加上巴塞又贏埋維拉利爾,試問皇馬喺聯賽仲點追?
C朗馬些路瞄準今場上陣
相對地,歐聯就更值得佢哋搏殺,所以兩名受傷嘅進攻主力C朗、馬些路,都瞄準呢場大波復出,加上皇馬仲有艾迪巴約同傷愈復出嘅希古恩,前線攻擊力一樣相當強。
雖然皇馬主帥莫連奴賽前話,球員喺輸畀希杭後信心受損,加上陣中傷兵滿營,C朗同馬些路都紮住上,今仗面對熱刺只會求和算數,不過「寸王」向來都鍾意放煙幕,阿占就同熱刺領隊夏利列納一樣,點都唔信銀河艦隊會打守勢波。
艾朗連儂巴利雙翼齊飛
熱刺方面,加里夫巴利同艾朗連儂兩隻快翼近期都有傷,但就講明會爭取喺今場上陣,睇得出佢哋同皇馬之前都收埋啲秘密武器,今晚一次過晒冷對攻,入波想少啲都難。
睇番啲有趣數據,皇馬近22場主場賽事有19場波射入兩球或以上,至於熱刺今季22場作客亦有18場取得入球,大家攻擊力都唔弱,今晚入球大包無甩拖!