歐霸盃8強賽事今晚展開，大熱門波圖主場全力出擊，迎戰8強中牌面最弱嘅莫斯科斯巴達。波圖啱啱提早奪得葡超冠軍，今場冇後顧之下，相信可輕取近期戰績回落嘅客軍，熱捧1.9倍「讓球主勝」！（有線62及202周五凌晨3:05直播）
斯巴達作客2連敗
被足智彩列為3倍大熱門嘅波圖，上場喺聯賽作客贏賓菲加2:1錄得7連勝，更提早5輪奪得葡超冠軍，依家可以全力於盃賽爭勝。波圖今場有喺16強停賽嘅後衞艾華路佩雷拉刑滿復出，而另一守將路蘭度近期受到多間英超球會青睞，今仗勢必於歐洲賽場大打身價波。波圖創會以來一直剋住俄羅斯球會，上圈雙殺中央陸軍晉級後，歷史上6次對俄超球隊錄得4勝2和不敗佳績，今晚主場出擊唔難輕鬆贏波。
莫斯科斯巴達為今屆歐霸盃奪標大冷門，作客到訪波圖自然難被睇好，事實上佢哋近期戰績亦有所下滑，上場聯賽輸咗畀古賓後，不單作客兩連敗，更喺聯賽榜跌到落中下游，今仗作客葡超班霸睇怕難有作為。
