「好毒呀呢招!」畢爾包今晚喺西甲主場再遇皇家馬德里,好難有運行,賽前皇馬用毒招打擊畢爾包戰意,放風話會喺暑假收購對方王牌中鋒洛蘭迪,咁樣搞法,試問洛蘭迪邊有決心爭取士哥?再講,皇馬嘅C朗同希古恩最鍾意入波食「包」,1.58倍客W抵食夾大件。(now632及660台周日凌晨0:00直播)
畢爾包會喺今季結束後進行會長大選,西班牙傳媒認為,假如選舉前唔能夠成功氹掂洛蘭迪續約,皇馬就會喺暑假博大霧搶人,而且唱到全世界都知,除非洛蘭迪嫌錢腥,又或者打算終生效忠畢爾包,否則佢今場對住皇馬門將卡斯拿斯,都幾難的起心肝用全力攻門,現實就係咁,邊個想同未來老細作對?
C朗鬥畢爾包多波入
另一方面,皇馬上周喺主場畀希杭打爆,教練莫連奴個人連續9年聯賽主場不敗紀錄結束,以佢咁要面嘅性格,冇理由頂得住連衰兩場聯賽。仲有呀,日前皇馬喺歐聯大勝熱刺4:0,射手希古恩同中場卡卡分別以後備身份復出,就算前鋒賓施馬同左閘馬些路因傷病冇隨隊,莫連奴都有大把武器開客W。
如果睇埋往績,就更加冇理由唔捧皇馬,過去13次對賽,畢爾包得1勝12負,最近兩次碰頭同樣輸1:5,而且C朗同希古恩專門同畢爾包過唔去,每次對陣都發晒茅要入波,C朗近兩次對賽勁入4球,包括今季首循環連中三元,希古恩近6次對賽就得1次冇波入,省入6球威到盡,有佢幫手3分依絲執。
畢爾包半場4連和
‧連續4場聯賽半場打和。
‧近8場聯賽僅得1場冇失波。
皇馬平均每場入3粒
‧近6次作客交手5勝1負。
‧近7場有6勝1負,攻入21球,平均每場入3粒。