經過歐聯、歐霸一星期,最估佢唔到嘅球隊肯定係國際米蘭,有咩理由會喺聖西路輸2比5,未打次回合已經差唔多肯定出局。場波係睇到谷鬼氣,有史坦高域同迪亞高米列圖幫手捱到半場,但蘭奴捷亞又唔爭氣,送個烏龍球畀史浩克。
今晚國米再喺主場出擊對基爾禾希望能夠做場好戲啦,歐聯已打定輸數,聯賽榜只同AC相差五分,依家當然係搏命追番上去嘅時候。
主場成績意甲第一
國米雖然上輪不敵AC,但今季主場算企得穩陣,亦係廿支意甲球隊入面主場成績最好一隊,十五場賽事十一勝三和一負,今晚對手只係級數一般嘅基爾禾,國米近四次主場對基爾禾全勝,今晚我撐國米回魂。