阿仙奴領隊雲格轉口風，話今季英超攞亞軍並非災難！早前兵工廠雄心壯志，雲帥豪言要問鼎所有錦標，但現時諸事不順，佢不甘被喪插，反駁球迷要知足，話攞第二已經好叻仔，唔知一眾「廠迷」聽完有乜感想？
雲格叫廠迷阿二照收貨
阿仙奴對上五季都食白果，一隻盃仔都攞唔到，本季亦先後失落英聯盃、歐聯同英足盃，粉絲們怨聲載道，直斥雲格「細路政策」唔掂。雲帥面皮薄，忍唔住出聲反擊：「我唔明球迷個腦諗乜，攞得英超亞軍好差咩？本季阿仙奴表現一流，一班戰將盡晒力，佢哋應該得到更多尊重。英超中有球隊比我哋投資多十倍，但阿仙奴都可以壓住佢哋；而聯賽中阿仙奴失球亦少過曼聯，但冇人睇到呢啲嘢。要斷定一支球隊成功與否，攞唔攞到盃並非唯一指標，如果有球隊係好過我哋，就要去接受。」
另外，黑池季尾大跌Watt，今年於聯賽只攞到八分，領隊荷路維為紓緩球員護級壓力，破例准許佢哋飲酒，希望用「非常」方法拯救球隊。
