國際米蘭首回合大敗後，最為人詬病肯定係條豆腐防線，球隊今仗迎來及時雨，養傷五個月嘅中堅森美爾已經傷愈，並被列入今次大軍名單，必要時可粉墨登場救亡，避免再次大敗畀史浩克04。
森美爾係國米上季奪三冠王主力，但佢自上年十一月受傷後一直缺陣，球隊新簽嘅蘭奴捷亞演出亦未如理想，更於首回合擺烏龍，令球迷更加懷念森美爾。雖然佢剛剛復操，但教練李安納度都召佢入大軍名單，足見呢位阿根廷守將對國米極之重要。
提早復出幫手爭標
國米班主莫拉堤亦點名讚森美爾，指如果佢唔係長期受傷缺陣，球隊成績應該會更好。原本森美爾被診定為提早收咧，但依家可以奇迹復出，為國米季尾爭標注入新力量
