《是日正菜》炮製「韓式料理」畀各位歎,保頓今晚喺足總盃4強對史篤城,雖然有射手史杜列治因為唔符合上陣資格缺陣,但咁樣反而益咗南韓國腳李青龍有機會打正選,佢嘅腳法同速度,對住技術粗糙嘅史篤城中後場球員,絕對啱使,平手捧保頓有着數(now671台周日晚11:00直播)
史杜列治以借將身份効力保頓,聯賽上陣8場勁入6球,唔踢得的確係損失,但其實今季失去必然正選位置嘅李青龍,開季至今踢29場有4個入球、7次助攻,表現唔輸蝕過上季,上星期對韋斯咸佢難得正選出戰,即刻入波顯身價,加上聯賽首循環佢攻破過史篤城大門,繼續發威絕對唔出奇。
入波泉源多唔怕爛仔波
仲有呀,史篤城後防線上嘅賀夫同梳爾哥斯,都屬於高大論盡型,對住走位靈活嘅李青龍,好容易出事。再講,保頓陣中有大把攻擊球員用,奇雲戴維斯、艾文達、馬田柏杜夫、卡斯歷甚至洛迪高摩連奴都有能力入波,無論點秤法,呢場保頓嘅牌面都高啲。
講番隊史篤城,戴納「手榴彈」嘅威力今季明顯減弱咗,何況保頓球員踢慣爛仔波,根本唔怕衝撞,只要佢哋頂得住對方嘅界外球戰術,相信史篤城唔會有咩特別板斧入波,被淘汰好正常,唔好忘記,史篤城有後防重心希堅保咸養傷,即使中鋒卡維有機會傷愈復出,都唔似有本事入決賽喎。