今晚有場葡超獨腳戲，日前躋身歐霸盃4強嘅布拉加作客國民隊，前者正值強勢，嚟緊周中又唔使踢歐霸盃，一於捧佢哋聯賽贏波確保來屆歐霸盃資格，要2.25倍客W。（開賽時間：周二凌晨3:15）
布拉加依家排葡超第3位，領先排第6位嘅國民隊8分，今場只要贏波就可以提早奪得下屆歐霸盃資格。事實上，布拉加喺聯賽表現不俗，近5場全勝之餘仲要平均每場入2粒，加上陣內只有雲尼斯奧利華拉一名長期傷兵，今日可以話夫添出擊。更重要係歐霸盃4強去到月尾先舉行，球員可以盡情喺聯賽拚盡爭勝。
另邊廂嘅國民隊雖同樣要為歐洲賽資格努力，可惜佢哋走勢飄忽，防線更頻頻出現漏洞，近6場就夾埋失咗9球波，面對實力雄厚嘅布拉加更難保不失。睇埋往績，國民隊近5次交手都未贏過，今次仲要遇着對方勢兇夾狼，睇怕都凶多吉少啦！
