雖然維拉利爾有前鋒尼爾馬同中場辛迪卡索拉喺歐霸盃坐完波監,可以喺今場復出,但隊長辛拿、中堅干沙路洛迪古斯同後衞安祖盧比斯養緊傷,最近比賽踢得咁密,唔排除教練加度列今場會變陣,影響全隊進攻流暢性,大家知啦,今季維拉利爾入球幾乎集中晒喺基奧斯比羅斯身上,淨係靠佢未必夠開大。
放棄聯賽專注歐霸
仲有呀,維拉利爾近10場聯賽得2勝3和5負,完全唔對辦,睇得出佢哋已經將全部注意力,轉移晒去歐霸盃,就算今場主場出擊,都未必肯的起心肝入波,有利開入球細。另一方面,薩拉戈薩今季聯賽作客15場得8個入球,勁唔掂,加上佢哋要搶分護級唔敢亂攻,要求佢哋作客開入球騷,同樣係唔多切合實際喎。
唔可以唔提嘅係,薩拉戈薩嘅射手烏捷被基達菲睇中,對方嘅高層仲話,希望薩拉戈薩盡快決定賣唔賣,試問烏捷聽見,仲邊有動力搏殺先?打工仔心理,有幾多人跳槽前肯繼續100%為公司貢獻先?假如作為單箭頭嘅烏捷Hea踢,睇怕薩拉戈薩想入波都唔易,玩入球細有着數。足球彩票 足彩预测
薩拉戈薩作客死火
‧近4場作客得1個入球。
‧今季聯賽作客得1勝6和8負。
黃色潛艇半場硬淨
‧對上6場聯賽得4個入球。
‧連盃賽近11場未試過半場落後,8次領先、3次打和