殺入爭標大直路,曼聯今仗有朗尼強勢回歸,對紅魔鬼極其重要,因為朗尼係紐卡素剋星。自○四年加盟紅魔後,朗尼五次於聯賽去到聖占士球場一共轟入六球,每次入波都係曼聯攞三分保證!
朗尼作客鬥「喜鵲」特別醒神,去季曼聯先失一粒,但佢同貝碧各入一球,帶領紅魔鬼反勝;前季佢個人省入兩球,協助紅魔大勝五比一;而佢披起曼聯球衣當季就即時梅開二度,紐卡素縱有主場之利都輸一比三。朗尼係天生「喜鵲殺手」,今場及時復出,對曼聯爭勝有極大幫助。
另外,曼聯中堅里奧費迪南日前於英足盃不敵曼城一仗追打巴洛迪利,賽後佢於Twitter就事件解畫,指巴洛迪利行為挑釁抵鬧,但自己反應亦過激,故佢為自己衝動行為公開道歉。