赛前分析:红魔注定做曼市一哥?
曼联注定做曼彻斯特一哥?根据目前英超形势,红魔有机会喺「5.14」作客布力般流浪嘅联赛,打破利物浦纪录破天荒第19次夺得联赛冠军。咁啱曼城同日与史笃城踢足总盃决赛,争夺佢哋35年来首项重要锦标,两场波开赛时间只差半个钟头,即係话曼城捧到盃,风头都可能被死对头曼联抢晒,认真惨情。
现时曼联有73分、车路士67分、阿仙奴64分,剩低4轮联赛,假设曼联紧接对争标对手兵工厂同车仔分别和波同赢波,就可以提前两轮捧盃。不过红魔要分心应付欧联,连续「破厂拆车」有难度,所以专家估计,曼联有可能喺5月14日对布力般嘅比赛,登上今季英超冠军宝座。
对曼城球迷嚟讲,「5.14」都係非常重要嘅日子,到时佢哋同史笃城喺温布莱球场争足总盃,正因为咁,唔少曼彻斯特高官同市民都认为,曼联对布力般有需要改期让路,避免曼城成为足总盃冠军冇人理,可惜联赛会暂时冇反应,如果两队真係同日捧盃,曼城球迷惟有怨个天唔肯畀佢威过曼联啦!