自由盃听朝上演决赛首回合，由乌拉圭劲旅彭拿路主场斗巴西嘅山度士。咪以为山度士有「新比利」尼马压阵就实食冇黐牙，查实佢哋受到智利火山爆发影响，要捱12粒鐘巴士先去到乌拉圭，状态难免受影响，平手盘我捧主队。（有线61及广东体育周四早上8:50直播）
智利个普耶韦火山近排爆发，影响埋邻近国家，想话坐飞机去乌拉圭都唔得，山度士大军要去到比赛场地，惟有先去巴西嘅阿莱格里港，然后再坐长达12小时巴士先掂。舟车劳顿已经够烦，最惨係大军阵容一样唔完整，中场重心甘素伤愈冇耐，仲未够状态出战，其餘前锋马干费拿度、后衞里奥同庄拿芬施些路都要养伤，伊度达辛拿则要停赛，战斗力受损，作客波你估话赢就赢咩？
彭拿路闭门操杀着
彭拿路方面，呢支5届自由盃冠军大赛经验丰富，主帅迪高阿古利亦曾经以球员身份捧盃。佢哋为赢冠军，近排一改作风选择闭门操练，连批超级Fans想喺球场外「偷窥」练波，都即刻畀球场保安赶走。赛前消息话，佢哋今仗唔会打盯人防守，只会用联防去对付盛传将过档皇马嘅尼马，队波上下信心足，有地利可先下一城。
