低處未算低！阿甲老字號河床日前竟喺護級附加賽首回合作客不敵乙組仔貝格拉諾，結果觸發球迷大規模示威，仲威脅要殺死晒佢哋，壓力大到得人驚，好衰唔衰今晚次回合返主場陣容仲要天殘地缺，朱楓睇好貝格拉諾可以再爆冷開出2.3倍「讓球客勝」！（開賽時間：周一凌晨2:00）
擁有110年歷史嘅河床，正面臨球會史上首次降班危機，皆因日前喺護級附加賽首回合，作客居然以0:2不敵乙組仔貝格拉諾。其實喺比賽途中，河床班球迷已經勁不滿隊波表現，一度整爛圍欄衝落球場叫球員醒神啲，令比賽一度暫停10分鐘，可惜最後都冇用。翌日數百球迷更走去河床主場門口，要求主席巴薩里拉同教練JJ盧比斯下台，甚至拉橫額話要殺死班球員，結果最後要勞煩警察出動盾牌同水炮驅散示威者。
貝格拉諾近8戰僅1敗
由於河床球迷近日不斷搞事，賽前外傳今晚對貝格拉諾可能被禁閉門作賽，但到目前為止都未有下文，即係話今晚河床個接近6萬人嘅主場好大機會坐爆，河床班球員唔驚就假，好衰唔衰隊長艾美達、右閘柏保路費拉利同巴拉圭國腳艾達拔圖路文全部停賽，中場祖斯美亞巴朗亦已返秘魯國家隊報到，對住近8場只係輸過1場咁大把嘅貝格拉諾，睇嚟河床今鋪神仙難救，下季乙組見啦！
阿甲附加賽賽制
採主客兩回合制，勝方獲得來季阿甲資格，若兩回合總比數打和，不設作客入球優惠，甲組隊將獲得留級資格。
