今晚車路士主場大戰曼聯,車仔最大弱點表面睇肯定係費托,事關佢自從加盟車路士後就一直陷入球荒,不過施治近日開腔撐佢,透露佢平時練波入波如麻,堅信佢唔係「舒夫真高二世」!
操練成日入波
車路士早前花5,000萬鎊買入利物浦前鋒費蘭度托利斯,諗住增強火力,點知費托之後踢9場波,竟然一直食白果被嘲笑為「廢托」,仲被球迷攞嚟同球會史上最大水貨舒夫真高相提並論,不過車仔門將施治近日就出聲撐佢:「費托成日喺練波時入波,佢好了解英超,呢個係佢嘅優勢,我唔擔心佢會步『軍刀』後塵。其實費托喺場上表現唔曳,入唔到波只係唔好彩。我肯定佢取得首個士哥後,入球將會源源不絕!」
曼聯領隊費格遜賽前話佢哋喺08年歐聯決賽贏過車路士,今場心理上會有優勢,不過施治就反擊曼聯當日贏波只係「符碌」,臨尾射贏12碼贏在有運,即管睇吓今屆幸運女神又眷顧邊隊!