今次同大家研究蘇超賽事，現時榜首形勢緊湊，些路迪以兩分領先格拉斯哥流浪，優勢唔算明顯，餘下賽事不容有失。些路迪今晚主場對喜伯年，對手近七場聯賽不敗，聲勢相當強勁，主勝賠率偏低忌捧，考慮些路迪最近面對喜伯年經常煲「魚生粥」，可冷敲3.8倍「讓球和」。（周四凌晨2時45分開賽）
些路迪屬蘇超頂級球隊，擁有龍格保、森馬拉斯、史杜基斯及加利賀柏等球星，於聯賽實力超班，目前同死敵格拉斯哥流浪雙雙拋離其他對手，實屬意料中事。不過，由於些路迪評級極高，所以面對次級球隊往往要大幅讓波，今次面對喜伯年讓到球半，明顯讓得太多，上盤揀唔落手。
喜伯年回勇頂得吓
另一邊廂喜伯年係蘇超二線球隊，計實力唔算太差，現時排名咁低，主要係因為喺去年十一月尾至今年一月尾陷入低潮。不過，大軍喺二月重新踏入升軌，近七場聯賽保持不敗，取得五勝兩和，水準漸見穩定，以目前情況睇，喜伯年仍然有力延續升浪，今次作客些路迪未必大敗收場。
些路迪今場贏面較高，但主勝賠率偏低，博彩價值不大。翻查往績，些路迪近六次對喜伯年取得五勝一負，其中四場小勝一球，3.8倍「讓球和」絕對博得過。
