歐聯8強首回合今晚繼續有好戲上演，奪標熱門巴塞隆拿主場出擊，迎戰烏克蘭一哥薩克達。巴塞實力雖然明顯高出一截，但亦冇掉以輕心，上仗聯賽作客維拉利爾都夠膽起用副選，今晚抖夠之後可望輕鬆擊敗薩克達，熱捧1.5倍「讓球主勝」。（有線61及201周四凌晨2:45直播）
如日中天嘅巴塞，今季喺各項賽事幾乎毫無敵手，整季贏波率接近8成，難怪被認定係今屆歐聯奪標大熱門，由於聯賽死敵皇馬於上周末輸波，巴塞將榜首優勢拋開到8分，西甲冠軍十拿九穩，可以專心於歐聯爭勝。
巴塞今戰都有唔少好消息，雖然守將佩奧爾同艾比度仲未踢得，不過上仗因傷打後備嘅美斯肯定會復任正選，中場指揮官沙維亦都坐完波監，至於早前養傷嘅前鋒柏度洛迪古斯及左閘麥士維亦都復操，今仗可以正選披甲。
薩克達主攻唔識收
2009年捧走歐洲足協盃嘅薩克達，今屆歷史性首次打到入歐聯8強，算係超額完成。雖然佢哋能夠於分組賽力壓阿仙奴首名出線，但呢支主攻嘅球隊往往作客都「唔識收」，今屆就試過作客慘敗畀阿仙奴1:5，今次嚟到魯營大有可能重蹈覆轍，更何況強如阿仙奴同皇馬，造訪近22次主場20勝嘅巴塞都大敗而回，就連教練盧捷斯古賽前都坦承對手係今屆熱門，今場波只能夠盡吓人事。
羅馬密斟哥迪奧拿
據意大利《體育報》尋日報道，剛啱股權易手嘅意甲球會羅馬，秘密接觸過巴塞教頭哥迪奧拿，希望搵佢中興呢間首都球會，份報紙仲話有興趣轉換環境嘅哥帥，依家亦畀英超豪門車路士睇中。
巴塞主場22戰20勝
‧連續22次主場不敗，錄得20勝2和。
‧今季於各項盃賽主場7勝1和，贏波嘅賽事均淨勝對手2球。
薩克達征西冇運行
‧今屆於歐聯4場作客賽事合共失7球。
‧歷史上6次作客西班牙球隊錄得1勝1和4負。
