係人都知好心有好報,但係如果兩個善長仁翁對壘,會係言和定會分出勝負呢?今晚亞冠盃H組賽事水原藍翼主場對鹿島鹿角,就會畀到大家一個答案嘞。不過,水原近15年嚟响亞冠盃主場出擊未輸過波,個2倍主勝點都值得一博!(now671台周三晚6:30直播)
日韓球隊向來鍾意參與社區慈善活動,東日本大地震之後,日職球隊更加全力投入救災,當中出身岩手縣嘅鹿島主將小笠原滿男,更加稱得上係慈善之王,到處探訪難民收容中心,係賑災活動都參加,早兩日仲建議鹿島鹿角响大本營會所同球場撥出地方,畀啲茨城縣菜農賣農產品解決困境,事關啲蔬菜驗出核輻射超標之後,冇乜人敢買,小笠原希望利用球會聲譽幫幫菜農,令啲食家有番信心,認真好心地。
小笠原籲救救菜農
水原藍翼嗰邊亦唔輸蝕,前鋒廉基勳早幾日化身「愛的傳道人」,去咗探望一班肢體傷殘兒童。原來佢仲一直有做呢啲送暖行動,舊年仲捐過2,000萬韓圜畀班癌病兒童添,嗰份愛心絕對唔遜色得過小笠原。
鹿島用18歲o靚仔後衞牙煙
只不過球場上始終要真刀真槍,冇得講仁慈,水原今日主場出擊始終着數過鹿島,首先佢哋15年嚟响主場踢亞冠盃都未輸過,而且以往4戰鹿島取得2勝1和1負,雖則新簽嘅外援前鋒馬些路、基列治因為轉會手續延誤,報唔切名打亞冠,另一件巴西兵貝格臣亦傷咗隻手,但係今年水原大事擴軍,冇咗幾件外援,都仲有崔成國、河太均幾件猛人衝鋒,唔使驚攻擊力唔夠。相反鹿島自地震後,將近1個月冇正式比賽同練波,上個月28號先至復操,班人狀態好成問題,後衞伊野波雅彥又傷咗,焗住捉個18歲o靚仔昌子源頂檔,去到韓國真係好難偷雞,博水原主W啦!
亞冠盃賽制
32支球隊分8組進行分組賽,每組4隊,採聯賽雙循環制,8支小組首名及次名球隊,共16隊躋身16強淘汰賽。