車路士今晚會响歐聯8強首回合主場出戰曼聯,通常歐聯大戰首回合,雙方多數行事小心步步為營,睇個勢今晚雙方都會先摸一摸底,呢場英格蘭內訌,小妹撐1.54倍入球細。(有線62、64、202及203、中央5台周四凌晨2:45直播)
車仔同曼聯呢兩支英超最強球隊响歐聯交手,令我諗起3年前場歐聯決賽,當時曼聯多得泰利射失12碼反勝捧盃,令油王班主阿布拉莫域多年來嘅願望再次落空。啱啱個周末又適逢係「曼聯之夜」,阿仙奴、車路士接連失分,聯賽錦標似乎大局已定!我睇車仔同曼聯都可以將全副心機放晒落歐聯度。
紅魔防線固若金湯
前線方面,據報藍戰士今場用番費托打正選,大家都知一出費托,成隊車仔中前場都要就位,鋒力都大受影響,連帶杜奧巴等人都威力銳減。至於曼聯,賽前有消息指朗尼尋日朝早缺操,即使今場正選披甲,鬥心狀態都成疑問。
睇埋後防,尼曼查維迪今晚個拍檔可能係神奇復出嘅里奧費迪南,若果有呢對最佳中堅上陣,加埋表現穩健嘅雲達沙,曼聯防線可以話固若金湯。無論係費格遜定係安察洛堤,大家都係歐聯冠軍教頭,深知首回合立於不敗之地嘅重要性,相信雙方都會縮手縮腳,將重點擺响防守方面。
16強8場首回合6戰開細
其實首回合悶戰,留番次回合先搏命,都已經係歐洲賽基本玩法,好似上圈16強8場首回合就有6場開細,小妹恐怕今仗都會係開入球細!
連利福星好氣好力
今晚心水馬有第7場「連利福星」,季內表現穩定,休息一個月再出肯定好氣好力,賽前工夫積極兼且負磅無上場咁重 ,有力再開勝利之門!今仗最大對手會係「活力至寶」,上仗佢傷愈初出,負頂磅之下末段爆全場最快時間21.96,僅以一個鼻窿輸畀負輕18磅嘅「御鋒」;呢隻馬上季喺谷草同程1W1Q,今仗重返勝途威力十足!
歐聯賽制8強為主客兩回合制,今場為首回合賽事,若兩回合總比數打和,先計算作客入球,再和則在次回合90分鐘後,加時30分鐘,若雙方在加時取得相同數量入球,由作客球隊獲勝,若加時沒有入球,則互射12碼分勝負。
車仔主場降魔
‧近41次歐聯主場只係輸過2次。
‧對上6次主場鬥紅魔獲4勝2和。
曼聯歐聯入波少
‧歷來歐戰4遇英格蘭球隊全勝。
‧今屆歐聯8戰只攻入9球。