每隔幾季，就會有隊人腳唔曳嘅名牌降班，早幾年西甲有貝迪斯、英超有紐卡素、上季德甲就係哈化柏林，今季話唔埋係阿士東維拉。
唔少人都覺得護級名牌會逢凶化吉，去到重要關頭就會贏波，但實情係追到你嘔晒血都冇回報，好似德甲嘅禾夫斯堡，個個星期都有人博反彈，賠率偏熱之餘，仲要劑劑落飛，結果就成日贏形勢失分，至於維拉就係英超版嘅禾夫斯堡。
戴賓蜜月期已過
喺之前嘅國際賽期，英格蘭國家隊相當重用維拉戰將，戴倫賓特、艾舒利楊格、達寧全部都有出色表現，衰在呢班當打球星返到聯賽就完全兩回事。睇番維拉近期戰績，戴倫賓特加盟後嘅蜜月期已經結束，近8戰只係贏過同級對手布力般，未計尋晚賽事，只係高出安全線2分，證明水深火熱唔一定可以激起鬥志，今晚主場迎戰有路蘭、迪奧迪及白治停賽嘅紐卡素，都唔一定可以秤先，一於撐2倍「讓球客勝」啦，話晒「喜鵲」首循環對賽係贏6:0。（有線201及301、廣東體育周日晚11:00直播）
馬膽推介
S1-4場5 超群如意
今日越洋轉播澳港盃，唔熟氹仔嘅朋友，都會當快活谷咁賭，查實外檔唔一定蝕，所以「超群如意」排13檔都未驚過，呢隻全場最銳嘅香港代表，上場喺港澳盃雖然跑第2，但已經彈甩晒澳門代表，級數贏晒。
足球重心
紐卡素（讓球客勝）
