德甲進入倒數階段,排喺第2位嘅利華古遜今晚主場迎戰6連敗嘅聖保利,為求進一步追趕「一哥」多蒙特,今仗勢必搏盡以保爭標希望,加上佢哋主場火力素有保證,一於熱捧1.57倍「讓球主勝」。(有線61、64及202周日晚11:30直播)
利華古遜上周作客憑住前鋒悉尼森姆一箭定江山,作客小勝凱沙羅頓全取3分,僅落後榜首多蒙特7分。由於德甲只剩6輪比賽,利華要爭標除咗要寄望多蒙特失分之外,自己亦必須做好搶分本分,盡力贏埋嚟緊嘅賽事,就算即使爭標失敗仍可保住下屆歐聯席位。
聖保利殘陣6連敗
利華古遜近期火力旺盛,聯賽主場取得4連勝外,每場更可贏對手至少2粒,今次迎戰近4場狂失11球嘅聖保利相信實食冇黐牙。
聖保利錄得6連敗後已跌落降班區排列尾2,本身仍需為護級而努力,可惜中後場主將贊卡拉同巴迪爾斯上仗齊齊被逐,今仗要坐波監,而且門將馬迪亞斯夏恩、後衞禾斯及洛頓巴治先後加入十字兵之列,中後場出現嚴重真空,今次作客利華古遜恐怕有心無力。