力爭聯賽冠軍嘅AC米蘭，今晚作客費倫天拿。經過季初及季中低沉期後，「紫百合」去到季尾終回勇，連續六場聯賽保持不敗，球員打起信心兼有主場之利，今有力與AC抗爭到底。AC作客戰力打折扣，最近一次作客就輸畀巴勒莫，今次去到佛羅倫斯難言穩勝，費倫天拿受讓，捧1.82倍「讓球主勝」。（now 633周一凌晨2時45分直播）
費倫今場有梅度停賽，但呢位羅馬尼亞射手今季曾因停賽、受傷及被球隊雪藏而缺陣一段時間，隊友早就適應冇梅度嘅日子，影響唔會太大。另外瑞士中場比哈美都已經復操，可以畀教練米赫洛域多一個選擇。
AC缺尼斯達有隱憂
聯賽首循環AC喺主場對費倫都贏得幾辛苦，今次輪到費倫有主場之利，AC未必再有運行。值得一提係兩位前AC球員基拿甸奴及當拿度，賽前都講明唔會放軟手腳，尤其球隊對於來屆歐洲賽資格仍未死心，叫球迷唔使懷疑紫軍鬥志。
AC今場有伊巴謙莫域停賽期滿復出，今場好大機會與柏圖合作攻堅。不過早前傳出柏圖與伊巴謙莫域不和，更曾經喺更衣室互相指摘。依家二人喺場內貌合神離，未必可以發揮最佳水平。而中堅尼斯達又受傷，對於後防必有影響，讓波唔值博。
