黑池要為護級搏命,不過球隊近期成績差勁,對上4場聯賽只係攞得1分,成班球員都非常沮喪兼士氣低落。有見及此,領隊荷路維(下圖)日前竟然破天荒捉晒全隊連預備組去劈酒,寧願佢哋醉,都唔想佢哋坐喺度自怨自艾喎!
「邊個頹廢就踢佢籮柚!」
正當卡比路等名帥鼓勵英格蘭球員唔好飲咁多酒,荷路維就反其道而行,黑池上場聯賽慘吞富咸3蛋,之後一日黑池預備組又輸畀狼隊0:3,搞到全隊變晒「黑腳」兼冇晒信心,荷路維就話:「見到佢哋冇晒鬥志,我忍唔住鬧『你哋班白癡喺度做乜?』」
為免班球員繼續沉淪,荷路維叫晒所有A隊同預備組球員去一間意大利餐廳飲酒,而且成效都相當唔錯,荷路維表示:「我覺得佢哋飲完酒後精神咗,但如果畀我再見到有球員喺度自怨自艾,我一定會踢爆佢個八月十五!」