另一場歐聯八強次回合，史浩克04主場對國際米蘭。史浩克首回合作客爆冷大勝五比二，極大機會首次晉級四強，球隊今仗首要工作係做好防守力保勝果。國米教練李安納度早前承認大勢已去，似乎已放棄歐聯，爭勝決心成疑，呢種「大局已定」情況相信入波唔會多，博入球細為妙。（有線62及202台周四凌晨2時45分直播）
德國人一向以重視紀律見稱，以目標為本，既然大把在手，絕對冇需要乘勝追擊。特別係由蘭歷克執教後，史浩克成功整頓防線漏洞，起用祖爾麥迪比取代老將梅斯達，更係最成功一着，整體表現四平八穩。另外，史浩克進攻中場法芬今場停賽，令蘭歷克更有理由改用較防守陣容，首回合同國米搏槌情況，今仗應該唔會出現。
史奈達感冒或缺陣
國米上次輸波後，教練李安納度已經話要喺次回合收復失地屬不切實際想法，連主帥都講啲咁洩氣說話，球員又點會搏命？事實上，歐聯史上未有球隊可於首回合主場落後三球後取得晉級資格，所以李帥改為將注意力放於聯賽更加實際。
另外，國米中場靈魂史奈達患感冒或缺陣，對攻力肯定有影響。好消息係中堅盧斯奧停賽完畢復出，由佢扼守中路，起碼唔會重蹈首回合中門大開覆轍，捧細盤啱數。
