亞冠盃補賽又嚟，FC悉尼今晚喺H組主場對鹿島鹿角，受讓都未必惡得出，原因係悉尼火力唔夠，攻擊線上最有卡士嘅歷克卡利又打埋柴，對家鹿角因為練習場被地震破壞，比賽前5日已經到達澳洲備戰，決心打開今季勝利之門，戰意無敵要捧2倍客W。（開賽時間：周三晚6:00）
目前兩隊喺H組賽都係連和兩場，而且因為澳職未開咧，日職完全陷於停頓，悉尼同鹿角球員嘅實際比賽狀態，可以話半斤八両，照咁計法，球員質素明顯較低嘅悉尼，應該好難搵到着數。唔好講其他，淨係睇來自日本嘅悉尼中場森安洋文，登陸澳職前只係踢日本非聯賽JFL，就知叻極有限。
悉尼死火冇人識入波
更弊嘅係，悉尼今屆亞冠盃兩戰入得1球，唯一入過波嘅中場歷克卡利上場分組賽傷埋，要知道佢係悉尼嘅精英球員，即係唔受薪酬限制嘅最重要球星，冇埋佢，試問悉尼搵邊個入波？另一方面，鹿角開季4場波都打和，而且受到地震影響，曾一度停止所有操練，不過佢哋勁重視呢場波，客W依然靠得住。
由於練習場同主場嚴重破損，鹿角教練奧利華拉索性要求高層，安排全隊喺比賽前5日，提前拉隊到澳洲備戰同適應，專心應付今場比賽，有理由相信，奧利華拉會落柯打嗌球員搏盡搶3分，加上鹿角前線上嘅興梠慎三同大迫勇也今季未開齋，落場肯定更賣力，客W有2倍值得支持。
