周四凌晨歐聯八強次回合，首回合落後○比四嘅熱刺將於主場白鹿徑球場迎戰皇家馬德里。由於皇馬晉級在望，次回合唔大敗就掂，皇馬主帥莫連奴料會留力嚟緊嘅國家打吡，相反熱刺出局都想攞番個尾彩，熱刺受讓平半值得捧場！（有線61及201台周四凌晨2時45分直播)
主場受讓未衰過
皇馬首回合主場大勝熱刺四比○，戰果咁懸殊，某程度上係因為熱刺前鋒高治喺上半場初段領紅牌被逐，皇馬踢多一人先取得咁大領先優勢。熱刺近年進步神速，實力拍得住英超Big 4，論人腳同狀態，絕對唔會輸蝕畀皇馬好多，加上熱刺今季主場受讓未衰過，聯賽兩次主場對車路士及曼聯都打和，可見白鹿徑威力唔可以睇小。另外，快翼艾朗連儂已復出，隨時可落場搏殺，熱刺更添爭勝本錢。
事實上，皇馬已半隻腳踏入四強，以莫連奴性格根本唔會浪費彈藥，即使今場輸番畀熱刺一、兩球，佢都唔會介意，仲隨時會收起班主力，等佢哋休息吓，類似情況出現過喺西班牙盃，當時皇馬首回合大勝利雲特八比○，次回合出副選輸番○比二，可見皇馬唔介意面子，最重要係晉級。
皇馬留力撼巴塞
畢竟皇馬嚟緊幾場波非常關鍵，周日將於西甲主場迎戰巴塞隆拿，雖然皇馬爭標機會較渺茫，但首循環皇馬輸畀巴塞五球，莫連奴點都想報番一箭之仇，而下周中皇馬亦會喺西班牙盃決賽再遇巴塞，呢場關乎皇馬同巴塞邊隊可以率先於今季捧盃。有兩場咁關鍵嘅比賽，試問今場作客熱刺又點會搏，仲話讓波，真係過分咗啲囉！
