自由盃小組賽程安排都幾冇系統,同組球隊唔一定喺埋同一個禮拜有比賽,好彩去到最尾一輪都安排喺同時間上演,都算叫做公平。
學生隊Vs高士路設文字直播
聽朝會上演兩場G組煞科戰,齊齊篤定出線嘅學生隊同埋高士路會硬撼,今場馬會開設「即場投注」同「第一隊入球」,而且馬會網頁有文字直播,係馬會第一次接受冇電視直播嘅「即場投注」。
有別於歐聯賽制,自由盃小組冠軍唔一定對其他小組次名,實質係16支出線球隊會根據小組成績排次序,第1會對16,第2就對15,如此類推,睇落排名愈前愈着數,但實質對手係乜料係完全控制唔到,再者現階段唔少有機會出線嘅較低分球隊都係硬嘢,所以兩隊爭勝意欲唔係特別大,隨時悶和收場。(馬會網頁周四早上8:50文字直播)
至於瓜蘭尼迎戰杜利馬嘅例行公事,瓜蘭尼分組賽5連敗,今仗移師中立場作賽,主W仲熱過對手,有多少追開齋飛,但睇番往年嘅自由盃分組賽,6戰都贏唔到嘅球隊比比皆是,唔講其他,瓜蘭尼自己喺2009年嘅分組賽亦只係取得1和5負,完全唔夠班,今仗唔易攞尾彩,要讓杜利馬波我要1.5倍「讓客」。