歐聯大戰過後,今晚輪到上演歐霸盃八強次回合,四場比賽之中,其實有三場大局已定,但並唔代表冇投注價值,川迪主場對「黃色潛艇」維拉利爾,由於主隊首回合輸一比五,難望翻身,阿King估計佢哋好大機會採取「放棄」態度,專心爭聯賽錦標,川迪讓波,寧捧維拉利爾「讓球客勝」。(有線62及1台周五凌晨3時05分直播)
伐木者主場發力
另一場,莫斯科斯巴達主場對波圖,斯巴達首回合同樣輸一比五,但俄羅斯球隊主場一向好惡,有反撲能力,至於波圖攻力強橫,加上已奪聯賽冠軍,可放開懷抱踢悅目足球,捧入球大。至於美職波特蘭伐木者主場對芝加哥火燄,伐木者屬於美職新球隊,而且開季表現一般,但卻要讓平半,當然有理由,因為今仗係佢哋首次於美職主場出擊,當地球迷對伐木者抱有好大期望,相信主隊會使出渾身解數爭勝,一於捧上盤。