史浩克04打入歐聯四強,令德甲球隊人氣急升,引來更多投注者留意,Richard近期重點介紹科隆,之前已講過科隆主強客弱特性極之鮮明,只要佢哋主場出擊就捧,作客就反。科隆今輪主場對史特加,平手盤又係支持科隆嘅好時機。(周六晚9時30分開賽)
科隆走勢非常易捉,近七場聯賽主場全勝,而近八場作客二和六負,因此近六場德甲都係梅花間竹,贏一場輸一場,所以就算佢哋上仗作客以一比五慘敗於包尾球隊慕遜加柏腳下都毋須擔心,今仗返到自己地頭好大機會反彈。科隆早前作客以二比六輸畀漢堡,翌仗返回主場贏前列球隊紐倫堡,有辦畀大家睇,更何況今仗對手只係實力更差嘅史特加。
史特加近三仗面對下游分子禾夫斯堡、雲達不來梅及凱沙羅頓都贏唔到,特別係上仗領先情況下,以二比四不敵凱沙羅頓,反映史特加搶分有心無力。
事實上,由於德甲幾支護級分子近期頻頻一齊失分,史特加搶分壓力並非想像中咁大,今場要作客擊敗科隆相當困難。