一隊要鞏固榜首席位,一隊就要拚死脫離降班漩渦,AC米蘭同森多利亞今晚正面交鋒各有所求。「紅黑兵團」呢期愈戰愈勇,就算有伊巴謙莫域坐波監,由柏圖、羅賓奴同卡斯辛奴合組嘅「矮仔鐵三角」都一樣咁有殺傷力,撞正死氣沉沉嘅森多當然秤高一線,捧1.85倍「讓主」。(now633台周日凌晨2:45直播)
森多利亞14場僅1勝
AC目前以68分雄踞意甲榜首,不過只係比次席嘅拿玻里多3分,餘下6輪聯賽絕對不容有失。前鋒伊巴謙莫域上仗爆粗鬧球證被逐要坐3場波監,但咪忘記「紅黑兵團」冇伊巴謙都照喺「米蘭打吡」奏捷,以羅賓奴、柏圖同卡斯辛奴近9仗聯手攻入12球嘅火力嚟睇,相信伊巴謙嘅缺陣唔會對AC鋒力構成太大影響。
上季以第4名衝線嘅森多,今季卻淪落到要護級,亨格比利覺得佢哋搞成咁係自己攞嚟,畢竟會長加朗尼因私人恩怨賣走卡斯辛奴,又將最做到嘢嘅柏仙尼放畀國米,2人自1月離隊後森多喺意甲14場只係贏得1場,馬卡朗尼同馬捷達兩位鋒將擺明未夠班彌補兩大球星嘅空缺,今晚仲要有守將文連尼停賽添,輸少球都偷笑咯!