唔知係咁啱定夾好嘅,今個禮拜六堪稱係打吡日,因為除咗英格蘭、西班牙有打吡大戰上演,連阿甲都有阿維拉達德打吡——競賽會主場對獨立隊。
香港球迷對呢場阿甲打吡戰冇乜感覺,但係當地就唔同嘞,兩隊波嘅球員賽前都話感受到壓力,雙方擁躉亦諗盡方法去為隊波打氣,獨立隊班Fans就最寸,尋日朝睇完晨操之後,响訓練場掛咗幾條橫額,其中一條直情咁講:「場波仲未打,但係你哋贏硬。」
競賽會主場對賽勝率低
點解班獨立隊球迷咁有信心?首先由往績去講,競賽會近6次主場出戰「阿甲紅魔」獨立隊,只得1勝3和2負,勝率得17個巴仙左右,非常可憐;由近況去睇,競賽會聯賽4戰不勝,獨立隊就阿甲連自由盃8戰不敗,兩者狀態差好遠。
雖則獨立隊早兩日响自由盃曾經作客惡鬥彭拿路,比起一個禮拜只踢一場波嘅競賽會辛苦,仲要兩件龍門希拉里奧拿華路、艾斯文都有傷,今場波要起用加巴連尼把關,後防有些少隱憂,不過競賽會何嘗唔係有件中場祖雲尼摩蘭奴跛咗,大家都出唔足人,咁嘅格局寧願要獨立隊1.7倍「讓球客勝」好過。
獨立隊
(讓球客勝)