「謹慎、冷靜，咁樣就一定有好成績！」雖然慕遜加柏暫時喺德甲包尾，但近況唔算曳，教練法華更表明今晚作客緬恩斯非勝不可，戰意好到加零一，撞正對手後防仲要唔齊腳，呢場「讓球客勝」有1.88倍值得一試！（有線61及202、中央5台周六凌晨2:30直播）
上半季沉到爆嘅慕遜加柏，下半場明顯有改善，上場喺打吡戰更以5:1大炒科隆，當中中場新星馬高列奧斯更梅開二度，表現技驚四座，賽後慕遜雖然繼續排包尾，但距離護級安全線只有4分，護級重現曙光。
新星馬高列奧斯弗爆
教練法華早前曾定下目標，表示球隊只要喺餘下6場賽事取得12分，就有機會護級，隨住上場全取3分，法華賽前再次重申要喺餘下5場搶9分就夢想成真。雖然慕遜今場繼續有前鋒迪甘馬高同中場贊斯維辛倦勤，不過教練法華講明今仗對球隊護級極之重要，叮囑球員只要保持穩定表現，沉着應戰，就一定有好成績。值得一提，慕遜今晚作客緬恩斯嘅2萬幾張波飛已一早賣清，當中有2,200名慕遜球迷隨隊作客，聲勢唔差，相信慕遜一班球員都會分外落力。
緬恩斯下半季死火
同慕遜加柏相反，上半季威到爆嘅緬恩斯，下半季就死晒火，上場作客不敵漢諾威後已累積4戰不勝，後防大將洛維斯基更領紅，今場將聯同累積足夠黃牌嘅後防保史雲遜，同啱啱第二次做老竇嘅門將軒斯梅拿一齊缺陣，後防面臨大執位，隨時錯漏百出，對住矢志搶分嘅慕遜加柏，唔好話贏波，冇失波都唔係咁易。
緬恩斯交手旺開單
‧近8場獲2勝2和4負，場場都有失波。
‧近6次交手獲5勝1負，當中有5場開單。
慕遜作客近5成不敗
‧近8場獲3勝1和4負，當中只有2場食白果。
‧聯賽作客獲4勝2和8負，不敗率達43%。
好波有得睇
德甲‧緬恩斯 Vs 慕遜加柏
有線61及202、CC5‧
周六凌晨2:30
英冠‧諾域治 Vs 諾定咸森林
now638‧周六凌晨2:45
