「當你得18個球員用，你會期望佢哋踢得更好。」諾域治今晚喺主場迎戰諾定咸森林，未必能夠輕易反彈，因為森林有「升班專家」比利戴維斯做領隊，賽前佢話得18個球員用都唔怕，信心大過天，射手安梳爾更講明願意續約為佢賣命，戰意無敵1.75倍「讓球客勝」抵玩。（now638台周六凌晨2:45直播）
森林領隊比利戴維斯帶領過打比郡升上英超，最識諗計激發球員士氣，賽前佢話，由於中場高漢停賽，包括前鋒布力史托在內6個球員養傷，依家佢得番18個球員可以調動，不過喺咁惡劣嘅環境下，日前森林依然喺主場以2:0砌低般尼，結束連續9場不勝走勢，所以佢期望球員繼續有貨交。
諾域治壓力大勁跌Watt
目前森林落後第6位嘅列斯聯1分，為咗爭踢升班附加賽，比利戴維斯話今場絕對唔輸得，射手安梳爾就話，佢要集中精神幫森林升班，球季結束後自然會續約，咁識做，比利戴維斯實錫晒佢。另一方面，諾域治近4場得1勝2和1負，排名跌落第3位，睇得出球員因為壓力大跌Watt，近兩次對賽得1和1負要唔過。
