車路士一而再,再而三令一眾車迷失望。如果你話車路士係有心部署咁做,故意喺歐聯輸畀曼聯,然後專心喺聯賽收復失地,呢個講法簡直令人難以接受。今晚車仔喺英超作客西布朗,唔知可唔可以爭番口氣呢?
雖然西布朗今季16場主場賽事只贏過6場,不過自從鶴臣上任後,近期表現有好轉,已保持連續7場不敗紀錄,當中值得一讚主場贏過利物浦同和過阿仙奴。而首循環佢哋作客車仔不幸喪吞6蛋,因此我諗佢哋今晚必定報仇咁報,趁車仔士氣低落時踩多腳。
至於車路士,想拎下屆歐聯直接參賽資格惟有力保前3位置,想反超曼聯就唔使諗喇,爭第2似有些少機會。依家佢哋距離第2位嘅阿仙奴只差4分,加上兵工廠近況平平,嚟緊硬仗連場,星期日對完利物浦,隔4日又要作客熱刺,睇嚟雲格真係有排頭痕,因此車仔絕對有機會爭番個二哥。唯一令人關注嘅問題就係「費蘭度托利斯究竟幾時先入到第一球波呢?」再係咁落去,唔使到季尾,肯定會被人改名做「廢到爆托利斯」。