榮與辱、去或留,全部取決於今晚足總盃4強曼徹斯特打吡大戰結果。曼城喺中立場溫布萊球場硬撼曼聯,千祈咪隨便睇衰,最近有消息話,曼城領隊文仙尼同前鋒巴洛迪利,有可能喺暑假被踢走,為咗保住個金飯碗,相信佢哋會把握最後機會打翻身戰,1.7倍「讓球主勝」博得過! (now671台及廣東體育周日凌晨0:15直播)
最近3場聯賽,曼城只係贏過新特蘭,其餘兩場輸畀車路士同利物浦,上星期對紅軍更加有隊長泰維斯養傷。前日文仙尼證實,泰維斯大腿筋傷咗至少要抖兩個星期,今場唔會冒險派佢上陣,所以賽前佢放下尊嚴,公開向巴洛迪利求救,希望呢位超級麻煩友發揮神經刀本色,踢出身價波打爆曼聯,保住佢哋份絕世筍工。
曼城巴洛迪利效率唔曳
巴洛迪利代替泰維斯?唔好笑呀,其實巴洛迪利今季平均141分鐘就有士哥,比起泰維斯相隔145分鐘先有波入,表現一啲都唔輸蝕,只要佢肯聽文仙尼話,絕對有能力攻破紅魔大門。更何況,迪斯高加盟曼城後仲未有貨交,為免變成廢柴,巴洛迪利+迪斯高呢個5,100萬鎊天價鋒線組合,係時候發威。
紅魔硬仗連場朗尼停賽
曼聯方面,朗尼停賽有查維亞靴南迪斯同貝碧托夫頂上,表現唔會差好遠,但睇真啲賽程,就會發現紅魔3月至今踢9場波,對過車路士3次,又先後同利物浦、阿仙奴及馬賽碰頭,好難要求年紀大嘅傑斯、史高斯,同埋成日傷嘅路爾斯華倫西亞、里奧費迪南場場有貨賣,今場曼聯應該要變陣,未必延續到7連勝走勢。
曼城盃賽表現醒
‧對上12場盃賽,取得7勝4和1負。
‧近12場有8次保持不失。
紅魔離主場旺開大
‧近5次離主場作戰4次開大。
‧近4場攻入7球,當中攻入5球嘅朗尼停賽。
足智彩晉級隊伍賠率
(六)4 馬瑟韋爾‧1.68聖莊士東‧2.05
(六)44 曼城‧2.30 曼聯‧1.54
(日)5 鴨巴甸‧6.40 些路迪‧1.08
(日)17 保頓‧1.70 史篤城‧2.02
英足總盃賽制
英格蘭足總盃準決賽以一場定勝負,90分鐘內打成平手則加時30分鐘,再和則互射12碼決勝負。