西班牙「國家打吡」四部曲,今晚上演首回合,由皇家馬德里喺西甲主場硬撼巴塞隆拿,呢場朱楓睇好皇馬。事關「銀河艦隊」要後上爭標,首循環莫連奴同C朗又經歷人生最大敗仗,等咗咁耐肯定全力報仇,難得主場有得受讓,梗係捧1.53倍「讓球主勝」啦!(now632及660台、廣東體育周日凌晨4:00直播)
皇馬同巴塞今年認真冤家路窄,今晚喺西甲交手後,下周中又會喺西盃決賽碰頭,之後再喺歐聯4強兩回合開戰,18日內將4度交鋒。今晚兩隊喺西甲率先硬碰,賽前皇馬喺積分榜落後巴塞8分,如果想後上封王,今場可謂非勝不可,戰意肯定比大把喺手嘅巴塞為高。
皇馬強陣比比復出
不過朱楓認為呢場波除咗關乎西甲冠軍,仲關乎面子!皆因皇馬首循環作客巴塞慘敗0:5,絕對係教練莫連奴同C朗兩師徒人生最大污點,以兩人好勝嘅性格,今晚肯定扭盡六壬洗雪前恥。陣容方面,雖然皇馬今場有中場格尼路停賽,但就有歐聯停賽嘅守將比比復出,另外周中歐聯打後備嘅前鋒賓施馬、中場迪馬利亞同卡卡都可以候命,兵源極之充足。
巴塞防中唔夠人用
巴塞周中作客薩克達,結果憑美斯一箭定江山擊敗對手晉級。雖則話巴塞贏波後已將連勝紀錄增至5場,但佢哋近期傷兵唔少,前鋒保贊、後防艾比度同佩奧爾都因傷繼續缺陣,當中冇咗隊長佩奧爾影響極大,預計今場要由布斯基斯客串中堅,本來頂番布斯基斯防中位嘅最佳人選係馬斯真蘭奴,可惜今場佢要停賽,即係話巴塞今場只得番施度基達一名防守中場,就算美斯同恩尼斯達等8名主力有假唔放自行加操咁有鬥心,隨時前面入埋後面都頂唔住,成為今場波勝負關鍵!
皇馬西甲主場王
‧目前西甲主場王,獲14勝1負,勝率達93%。
‧近6次主場對巴塞獲3勝3負,當中有4場開大。
巴塞近戰多失守
‧目前西甲作客王,獲13勝2和,勝率達87%。
‧近8場獲7勝1和,但只得3場成功保持清白。