今季德甲無啦啦「變天」，幾間老牌球會到依家都仲有降班危機、拜仁隨時冇得踢歐聯、史浩克出奇不意咁殺咗入歐聯4強等，出現呢個現象，小弟認為除咗係德甲聯賽水準提升，大部分球隊變得正氣亦係主因。大部分中游分子即使冇嘢爭亦照搏老命，冇態嘅球隊想搵着數並唔易，禾夫斯堡遲遲未能上岸，就係咁嘅原因。
所以一心博反彈同揸住贏輸盤比率去估德甲，真係輸死都未天光。好似「蜜蜂兵團」多蒙特咁，有實力又有鬥志，你以為佢哋係虛火博斷纜，分分鐘依家已經破咗產。今晚佢哋喺主場迎戰弗賴堡，雖然有巴里奧斯趾骨受傷，需聯同長期十字兵香川真司、奇連治同基爾坐喺後備席，但呢班後生仔勝在踢整體快速攻擊，冇話冇咗邊個唔得，實力一樣靠得住。對家弗賴堡有後衞卡馬斯停賽，巴斯迪安斯打柴，呢條近5仗失10球嘅防線冇埋兩名大將，好難頂得住多蒙特，小弟撐1.68倍「讓球主勝」。
多蒙特
（讓球主勝）
