巴塞隆拿喺西甲一枝獨秀,不過來屆歐霸盃席位就爭崩頭。力爭歐洲賽入場券嘅愛斯賓奴同馬德里體育會今晚就正面交鋒,馬體會教頭科里斯用人夠薑,話之你係大球星,總之冇態一律要坐冷板,有呢位鐵腕主帥督師,班手足仲邊夠膽交行貨吖?一於捧2.1倍客勝。(now632及660台周一凌晨3:00直播)
馬體會近期爆出內訌,有傳部分隊友杯葛科蘭,特登唔畀波呢位烏拉圭前鋒,不過科蘭日前已經透過Twitter否認傳聞。
愛斯賓奴近11戰僅2勝
姑勿論呢單嘢堅定流,但科蘭今季的確係跌晒Watt,教頭科里斯用人亦都夠果斷,連續兩場聯賽將呢位南非世盃金球獎得主貶做後備,改以迪亞高哥斯達掛帥,結果球隊兩連勝總共轟入6球,效果出奇咁好。
主隊愛斯賓奴同科蘭一樣,新一年回晒塘,對上11場聯賽只係贏過兩場,最近對住馬拉加同靴高斯呢啲下游隊伍都要失分。最弊係中場查維馬基斯足踝未好番上陣成疑,射手沙治奧加西亞又因為右膝同肩傷提早收咧,成隊波又頹又殘邊夠馬體會鍊吖?