今晚意甲尾場上演前列大戰，由次席嘅拿玻里主場迎戰烏甸尼斯，客軍近期頹勢未止，加上兩大王牌射手都因傷避戰，造訪4連勝嘅拿玻里相信凶多吉少，正路捧1.62倍主W！（now633台周一凌晨2:45直播）
拿玻里取得4連勝後，繼續緊逼榜首嘅AC米蘭，莫講話幾乎肯定可以出席來屆歐聯分組賽，要贏埋意甲聯賽冠軍都唔係冇可能。今場佢哋仲有首席射手卡雲尼坐完波監復出，贏波本錢大大增加，以佢哋近16次主場取得12勝4和不敗佳績，唔難再一次全取3分。
拿玻里箭頭卡雲尼復出
烏甸尼斯之前個勢本來都幾好，一度以為有機會爭逐前4名，可惜近期狀態回落，聯賽兩連敗後，已經跌落第5位，最慘係佢哋嘅1、2號射手迪拿達利同阿歷士山齊士都有傷在身，今場好大機會踢唔到。睇番數據，兩人今季佔咗全隊聯賽總入球6成半有多，今仗要由倒戈嘅丹尼斯頂上點都爭啲，加上中場艾文阿布迪要坐波監，烏甸尼斯個陣咁殘，要搶分睇怕都要等下次喇。
