因遷就復活節假期，今輪德乙有三場賽事提早於周五凌晨舉行，力爭升班嘅波琴自從缺少受傷嘅鄭大世後，表現直線下滑，今仗對手柏達邦護級仍未肯定上岸，主場出擊一定搏命，波琴作客讓平半，下盤揸得過。（周五凌晨零時開賽）
波琴歇冬後個勢原本好好，由一月份開始曾保持十一場聯賽不敗，可惜主力鄭大世喺本月初對ＦＳＶ法蘭克福時受傷，冇咗佢之後攻擊頓失重心，對上兩場聯賽先後不敵哈化柏林及恩高斯達特，衝升班遭受嚴重打擊，而且後防主將安達耶希亞上仗領紅牌被逐，今仗坐波監，防守上亦有隱憂。
柏達邦聯賽已九場不勝，狀態一般，佢哋依家以五分領先尾三嘅奧斯納貝克，數字上仍未抵達安全線。球隊近兩場作客全敗，想搶分更要好好把握主場之利。波琴缺主將立即死火，連續兩場冇波入，作客冇本錢讓波，今場捧下盤。
另外兩場德乙，奧厄主場鬥科特布斯表面上係前列之爭，不過排第六嘅科特布斯已落後第三位嘅波琴七分，爭取升班附加賽資格機會不大，反而第五位嘅奧厄距離波琴只有三分，計戰意秤先，2.15倍主W可捧。最後奧斯納貝克主場鬥ＦＳＶ法蘭克福，奧斯納貝克去仗不敵榜首哈化柏林情有可原，為護級今返主場必打翻身仗。ＦＳＶ法蘭克福近七場作客輸六場，想搶分恐有心無力。
