聽朝有場美職獨腳戲,由兩支剛啱大勝完嘅球隊對碰,雖然華盛頓聯隊擁主場之利,但考慮到佢哋有美聯盃後顧之憂;相反紐約紅牛有星級射手亨利喺上場復出即錄得大捷,不妨再追2.5倍客勝。(開賽時間:周五早上8:00)
紐約紅牛因射手亨利季前受傷缺陣,搞到開季表現一般,但呢位星級鋒將上場復出首戰即攞到士哥,並協助隊波3:0大勝聖荷西地震,終止3場不勝走勢,預料亨利今場會繼續擔正。
紅牛貴為上季常規賽東岸一哥,因此唔使踢美聯盃預選賽,依家可以全心全意放喺聯賽爭勝,加上門將基格約瑟亦有望喺今仗復出把關,更添客軍贏波本錢。
至於華盛頓聯隊上場聯賽同樣以3:0贏波,但佢哋今場波後抖唔夠4日,又要應付美聯盃賽事,聽朝隨時收起部分主力。最慘係陣中傷兵問題嚴重,包括中場祖利亞卡里路、麥泰維殊、後衞沙尼爾以及門將哥連等都唔踢得,殘陣出戰下亦難寄予厚望。