今晚英冠獨腳戲，葉士域治會同諾域治合演「東昂格利亞打吡」，雙方近年交手例牌踢到飛沙劈石，預料今仗亦唔例外。諾域治要爭直接升班，預計作客都會照攻，葉士域治冇包袱亦肯定踢得夠放，敲1.85倍大最好路。（開賽時間：周五凌晨2:45）
以往「東昂格利亞打吡」嘅氣氛都非常熾熱，為免雙方球迷搞事，當地特別安排咗超過300名警察目及實呢場波，完場後更加會勒令客場Fans延遲離場，以便控制秩序。先講葉士域治，佢哋季中改由祖維爾掌舵之後明顯有起色，家陣唔憂降班之餘仲有一絲希望殺入升班附加賽區域，今晚仲唔同死敵諾域治駁火咩？
作客嘅「金絲雀」目前揸住74分排第3，終極目標就係直接升班，預期作客都會照攻博攞3分。養傷多時嘅前鋒基斯馬田已經復操，最重要係首席射手格蘭荷特腳風夠順，迄今已經攞到20個聯賽「士哥」，火力夠晒猛。再睇番雙方近6次交手，足足有4次開大，今仗都似係大手交易。
