於遷就受難節，「德甲星期五」改為周四上演。弗賴堡今晚喺主場對漢諾威，平手玩得過，原因係弗賴堡射手柏比斯施斯要入波博轉會阿仙奴，唔怕佢冇波入，相反漢諾威有兩大王牌耶高蘭同沙治奧賓度同時坐波監，進攻隨時癱瘓，輸埋都唔出奇喎。（有線61及202周五凌晨2:30直播）
命運係要自己創造嘅，弗賴堡嘅塞內加爾射手柏比斯施斯，依家就有機會嘞，今季佢喺聯賽攻入20球，德國盃有2球進帳，據聞好多英超球會對佢有興趣，布力般流浪、利物浦同阿仙奴都打算搶人，而且弗賴堡高層勁識做，冇諗住阻人發達，講明有人出得起1,300萬鎊，就可以帶柏比斯施斯離開。
消息話阿仙奴領隊雲格覺得價錢合理，好可能開價斟介，假如柏比斯施斯成功過檔，身價同人工肯定勁升，為咗完成登陸英超嘅願望，試問佢點會喺呢個時候放過漢諾威吖？再講，今季弗賴堡主場相當硬淨，近8次主場出擊有4勝2和2負，就算佢哋爭踢歐洲賽機會唔大，相信都唔會揸流攤令球迷失望。
另一方面，現時漢諾威只係落後第3位嘅拜仁慕尼黑1分，出席歐聯嘅美夢未破滅，弊在佢哋今場有首席射手耶高蘭同中場重心沙治奧賓度同時停賽，睇番數據，今季漢諾威聯賽入42球，佢哋兩個分別攻入13球同5球，即係話，夾埋佔咗全隊入球43%，突然唔踢得，話冇影響就呃你，作客好容易出事。
