嚟緊周五至下周一係復活節假期，打工仔可以休息吓鬆一鬆，但曾經叱咤歐洲球壇嘅韋斯咸、森多利亞同摩納哥，就要喺復活節打醒十二分精神，積極於聯賽搶分求「復活」護級。目前佢哋均於榜尾苦苦掙扎，降班危機水浸眼眉，本周再冇分落袋就麻煩。今輪呢寶貴三分，分分鐘係三支褪色勁旅嘅活命靈丹！
森多利亞誓贏包尾大幡
本季意甲降班球隊，不離目前榜尾七弱，尾七卡坦尼亞僅領先尾三森多利亞四分，輸多兩場分分鐘被拉埋落水。曾經喺九十年代叱咤歐洲球壇嘅森多一蹶不振，近九場聯賽拎得兩分，最大鑊係當中七場佢哋都入唔到波，攻力曳成咁，如果唔及時回勇，真係神仙難救。
森多季初擁有卡斯辛奴同柏仙尼時，仲係實力分子，有力爭來屆歐戰入場券，但自兩大靈魂分別離隊後，森多就失晒魂，攻不銳時守亦不穩。睇番球隊依家要靠馬卡朗尼、馬捷達等三流前鋒攻堅，就知形勢極為險峻，森多利亞限米煮限飯，若最終真係降班，其實亦絕不出奇。
森多未來五場聯賽，對手分別係巴里、布雷西亞、熱拿亞、巴勒莫同羅馬，而今輪作客包尾巴里，係佢哋最有機會全取三分嘅一場，相信森多上下都會出盡全力，希望打破近期不勝厄運。
