英超護級形勢非常激烈，第九位至包尾球隊只係相差八分，即係話過半數球隊仲有降班威脅！當中梗係以三支喺護級區嘅球隊，黑池、韋斯咸同狼隊最危險，其中曾奪三次足總盃冠軍嘅韋斯咸今季積極擴軍，人腳係各支護級球隊之冠，但卻落得如此下場，未來兩場硬仗對車仔同曼城，睇怕凶多吉少！
韋斯咸早前成績唔錯，一度取得兩勝兩和佳績，仲砌低埋利物浦，一度燃點起護級希望，點知最近連輸三場，跌落尾二位置，護級形勢告急。由於包尾嘅狼隊踢少一場，餘下賽程又較易應付，韋斯咸都幾大鑊！
韋斯咸能否護級成功，取決於隊長柏加嘅傷勢，呢位英格蘭國腳今季大熟，有佢在陣韋斯咸定好多，但當佢缺陣期間「錘仔幫」即時跌晒watt，故韋斯咸嘅命運可以話掌握喺中場重心柏加身上。
