进入最后直路,朱枫觉得依家最好睇唔系边队攞冠军,反而系边几队抢到下届欧联资格,今晚“三哥”国际米兰喺主场对“四奶”拉素可谓极之关键。国米日前喺意杯赢罗马成功反弹,赛后史坦高域话“蓝黑兵”依家无比团结,加上今场有杀手伊度奥复出,对住受伤停困扰嘅“蓝鹰”拉素,绝对有力延续近年对赛佳绩,热开1.62倍主W(now633及660台周六晚9:00直播)
AC目前喺意甲领先第2位拿玻里6分,喺联赛剩余五轮之下,夺标呼声极高,不过第3位嘅国际米兰同第4位嘅拉素,暂时只领先第5位嘅乌甸尼斯4分同1分,边两队攞到下届欧联资格真系可能要斗到煞科战先知。
拉素唔齐脚等劏
国米近排成绩麻麻,好在周中成功止血,喺意杯4强首回合作客勇挫罗马,赛后入波功臣史坦高域话虽然球队近期受负面消息困扰,但一班球员却有史以嚟咁团结,仲话觉得莫连奴冇可能食回头草,换言之即系撑教练李安纳度。事实上,国米CEO保利洛近日接受访问时,大爆李帅下季会继续执教国米,预计今晚喺射手伊度奥伤愈复出带动下,李帅必以赢波感谢一班高层嘅信任。
讲近况,拉素无疑比国米好,上场作客更以4:1大胜卡坦尼亚,可惜今场却唔齐脚,正选左闸史堤芬拉度因背伤提早收咧,前锋施古利亦因背伤肯定倦勤,加埋中场马度沙林停赛,兵源真系掹掹紧,最惨拉素近年作客国米仲要输多赢少,对上一次喺圣西路赢波已经喺1998年,今晚想破宿命唔系咁易!
国米为意甲主场王
‧目前意甲主场王,获12胜3和1负,胜率高达75%。
‧近13次主场对拉素获6胜7和。
拉素作客近7成开大
‧近11场联赛作客只得2胜3和6负。
‧目前联赛作客大盘王,有69%赛事开大