因意大利早前發生大水災令比賽取消,熱拿亞主場對國際米蘭嘅意甲周三凌晨進行補賽。今季國米聯賽戰績大倒退,排名激跌低到你唔信。老闆莫拉堤已打出告急牌,多次召見教練雲尼亞里開會。雖知國米決意重拾王者本色,但球隊有結構性問題,並非一時三刻可以解決得來,今場國米作客讓波信唔過,宜捧熱拿亞「讓球主勝」。(now 633及660周三凌晨3時45分直播)
國際米蘭自從改聘雲尼亞里執教之後,其實聯賽演出未見有大幅進步,絕唔似一支爭標球隊。隊長辛尼迪所謂對聯賽冠軍仍有信心,只不過係安慰說話,國米今季係龍係蟲,查實大家心中早有答案。今季國米未能打上爭霸行列,其中一個原因係球員老化兼傷患多,要直接解決問題就係羅致生力軍,奈何轉會市場要等到一月先至重開,所以呢班老弱殘兵最低限度要捱到歇冬。
國米連場硬仗攰爆
仲有,國米今季仍要應付歐聯,體力方面一定受影響。就好似有份踢歐聯嘅AC米蘭,踢完第六場小組賽後,周日晚就失分畀博洛尼亞。而去到周一凌晨,喺歐聯死亡之組取得出線資格嘅拿玻里,同樣失分畀榜下游球隊路華拿。兩個活生生例子擺喺面前,總唔相信嚴重老化嘅國米可以過到呢關。唔好忘記國米周日先同費倫天拿激戰,隔三日又要鬥熱拿亞,整體形勢比起AC及拿玻里更糟。
熱拿亞近況唔算太突出,但主場出擊總有一定威力,何況國米依家兵疲,熱拿亞搶分機會定必大大提升。既然主隊獲得受讓,1.54倍「讓球主勝」冇理由錯過